Beranda Cerita Pak Beluk Sesat di Kota

Sesat di Kota

25
0

LUM lame nih Pak Beluk diajaki kancenye Lihin pegi Kota Bengkulu. Karne kate Pak Beluk nye lah keruan gale jalan banyak di Kota tu, mangkenye Lihin mintak kawani dengan Pak Beluk.

“Lah keruan nian kamu jalan banyak di Kota tu Bapang Yung?” tanye Lihin ye agak curiga sebenarnye ngan gelagat Pak Beluk.

“Yak gampang kalu masih di Bengkulu nila ce. Aku ni lah idar pegi ke kota-kota besak,” uji Pak Beluk pede nian.

“Yak awu gila amun kamu lah paham gale,” timbal Lihin agi.

Sate nyampai di Kota Pak Beluk mulai ngajung Lihin yang mbawe motor. Sebab kenan sebenarnye lum paham nian jalan di kota tu. Anye karne Lihin lah percaye ngan Pak Beluk betanyelah kenan.

“Ce amun njak sini kekire ndak ke pantai jalan mane ye lemak. Kalu ade jalan ye agak perentas juge,” kate Lihin.

“Nah gampang itu tinggal lurus saje. Mulai njak sini kaba saje ye mbawe motor. Aku beguncing saje sambil nujukah jalan,” timbal Pak Beluk.

Lah lame pule raban ini beligat di kota tu, anye lum sampai-sampai ke tujuan. Karne kesal bemumutlah Lihin ngan Pak Beluk.

“Uji kate kamu keruan gale jalan di kota ni. Ngape lah pening palak aku beligat anye dide sampai-sampai kite ni,” uji Lihin semamam.

“Aku lah lame juge dide ke Bengkulu ni ce. Jadi kurang apal nian agi aku,” sintung Pak Beluk.

“Aii.. Lah kecul gale ijean ni. Itulah amun dide keruan jangan cak macak luk keruan nian. Amun luk ini lemaklah kite naik taksi saje njak tadi. Ini jalan-jalan dide jadi, palak bene,” uji Lihin. (roh)




LEAVE A REPLY

Please enter your comment!
Please enter your name here