Beranda Cerita Pak Beluk Salah Lubang

Salah Lubang

188
0

ADE-ade saje ulah Merin ngan Pak Beluk ni. Lum lame ini tadi Pak Beluk ngan Merin ndang ngintip kelakuan kawannye yang masih bujang, namenye Raju. Ame katenye, namenye diambik jak singkatan Ora Bebaju (Dide Bebaju). Singkat cerite, Pak Beluk ngan Merin sampai di badah kosan Raju.

Nampak ade nian nian suare Raju ngah betine didalam kosan itu. Duaghe kosan tebukak, Anye rombongan ni ndik ndak nginakan batang idung ngan Raju.
Ngintip jeme bedue ni jak jendile. Tetaluhan nian. Kalu tedengagh ngan Raju. Lum lame ade nian suare betine jak dalam.

“Nah dang, lah keghas juge setini. Masukanlah. Anye tetaluhan saje. Kele kukecakan. Kamu masukannye,” tedengagh ngan rombongan tu suare jak dalam.
Dengagh itu, saling pandang sekance ni. Lah mulai pikiran kotornye keluagh.

“Awu dik, tahan awu. Dang ni pai kali nilah seumur hidup masukan setini. Aku takut kalu tegajuk ujungnye ni kele bedarah,” timbal Raju.

“Ai dide nian gawi anak mude mak ini. Asak-asak ndak masukan saje,” Pak beluk bebisik ngan Merin.

“Awu, kite cegah, mangke budak due didalam ni dide tacambur ngah duse besak,” kate Merin ngenjuk kode.

“Awu malah kite masuk,” kate Pak Beluk.

Tapi rombongan ni tekanjat pai tedengagh ade suare betine mekik.

“Nah dang, ngeluagh darah. Ai sakik dang, banyak darahnye. Tolong cabut dang!!!,” pekik betine tu.

Ndik nian nganju agi Pak Beluk ngan Merin. Langsung masuk ndik ngucap salam agi.

“Woi tuape gawi kamu bedue ni. Ndang bebuat duse,” kate Pak Beluk sambil masuk kosan.

“Duse ape pule mamang Beluk. Cube kinak kudai iluk-iluk. Jangan ndak nganjatkah saje. Untung ndik tambah tecucuk jarum ni tadi,” kate Raju, sambil nginakah jarum ngah benang ditangannye.

Sementare gadis tu ngeluaghkah ayik mate nehankah sakik.

“Ooo jadi kamu bedue ni tadi bukan ndak bebuat duse,” tanye Merin.

“Bukan mang, aku ni tadi ndak jahitkan ade baju dang Raju ni cabik ketiak. Tapi aku lum pernah jahit, luk itu pule dang raju. Trus kami setulungan masukan benang ke jarum ni tadi,” jelas gadis tu, masih meringis.

“ooo luk itu. Yak udim kalu luk itu kami mintak maaf. Ubati kudai luke ditangan mu itu penakan,” kate Pak beluk ngah Merin, sambil garuk kepale ngeluagh jak kosan Raju.(rjs)




LEAVE A REPLY

Please enter your comment!
Please enter your name here