Beranda Cerita Pak Beluk Resleting Tebuka

Resleting Tebuka

45
0

PAK Beluk baru-baru ini ndak cubo bekerjo ikuti kancenye. Dide tanggung-tanggung kenan ndak cubo bergelut didalam dunia maya bidang pemberitaan. Kate Pak Beluk jangan baco koran dengan berita online saje. Cubo belajar pulo buat berita, sapo tau pacak besaing dengan kekawan lah ngikuti kemajuan zaman. Mulai jak koran cetak sampai media online kini modalnye jugo pakai HP yang lumayan canggih. Kalau soal mainkan HP kate Pak Beluk, lah jagonyo. Mulai jak SMS sampai nelpon jugo main internet.

Mulai lah Pak Beluk ikut kancenye Merin keliling dengan motor bughuknye nalak berita. Berita jugo dide ndak pilih-pilih nian, mulai jak jemo nalak umbut sampai makan ulam petai singkenye dibuat berita gale. “Ai cacam tape saje berita mu buatni. Cubo agak milih dikit beritani, jangan pulo jemo makan ulam petai dibuat gale beritani,” kate Merin.

“Kate mu lum lame ini, pas mato tebuka lah berita gale. Jadi ape saje tekinak buat gale berita,” timbal Pak Beluk.

“Bukan itu maksud aku. Cubo berita yang agak minat pembaco, dalak-dalak berita yang lagi viral. Contohnyo Pilkades pemilihan ulang dengan berita kejadian-kejadian,” Merin ngenjuk penjelasan.

“Ok, kalu iluak itu aku cubo kudai,” jawab Pak Beluk, singkat.

Saking semangat paginyo Pak Beluk langsung tancap gas ndak nemui Ketua Pilkades ndak cubo buat beritanye. Saking semangatnye, Pak Beluk lupo ngancingkan resleting celano levisnye. Singkenye banyak jemo senyum-senyum nginak Pak Beluk. Dalam ati Pak Beluk jemo senyum banyakni pasti nginak gaya kenan luar biase. Mulai jak stel pakaian sampai gaya ngiciak dengan narasumber.

Lah udim bejigak ke lapangan Pak Beluk langsung balik ke markas badah Merin.
“Merin banyak jemo di lapangan tadi senyum-senyum nginak aku. Mungkin gaya aku tampak kren dan jugo cara bahasa aku sampaikan sangat pas dengan kendak jemo banyakni,” Pak Beluk PD (percaya diri) abis.

“Banyak nian jemo senyum nginak kaba tu Pak Beluk, aku jugo ikut senyum pulo,” timbal Merin.

“Ini nah belum lame jemo nelpon ngicikan wartawan baru yang gantikanku, resleting celanonyo tebuka. Jadi bukan senyum nginak gayamu, tapi nginak resleting mu tebuka,” uji Merin sambik tetawe ngakak.

“Ai cacam maluan akuni, pagi istirahat kudai dalak berita. Jadilah balik kerjo lame lagi, ulang unjo di pasar. Ngape pulo de dijahito dengan Mak Beluk amen resleting lah rusakni. Rusak dunio persilatan kali ini,” uji Pak Beluk sambil ngarut palak. (man)




LEAVE A REPLY

Please enter your comment!
Please enter your name here