Beranda Cerita Pak Beluk Niup Durian

Niup Durian

49
0

WAKTU libur kemaghi Merin ngajaki Pak Beluk nunggu durian. Sebab ceritenye durian Merin kini lah banyak ye mulai umbanan. Waktu di pejalanan ke lokasi Merin nunjuki Pak Beluk bahwe ade carenye kalu ndak banyak dapat pas nunggu durian.

“Ce, ade carenye kalu ndak ngajung durian tu uban banyak,” kate Merin mulai nujuki Pak Beluk.

“Adak tape die titu ce?” Pak Beluk, semangat.

“Nah pas die empai umban tu kaba langsung tiup tangkai durian tu. Sebab kate nining dikale kalu ditiup tangkai durian empai umban tu kawannye ye lain nyusul pule umban,” Merin, njelaskan.

Lum lame pejalanan die bedue ni sampai di ghepang durian Merin. Sate turun njak motor langsung beligat ughang due ni bedalak durian ye lah umban. Amun Pak Beluk pas lah betemu ngan durian langsung saje kenan besasut niupi tangkai durian tu. Kenan yakin nian ngan saran kancenye ni tadi.

“Luk ape ce lah udim kaba tiupi tangkai durian ni tadi?” Merin, mastikah.

“Awu lah ampir bilang buah ye kite dapat nih aku tiupi gale tangkainye,” kate Pak Beluk.

Lah lame pule nunggu due sekantin ini, anye durian lum kilah ade ye umban agi. Mulai ngangat Pak Beluk dengan Merin.

“Yak luk mane tini Merin, ngape die dide ade umban agi durian kaba ni. Lah kesetengah malam kite nunggu ni, anye lum kila ade ye umban agi. Mane agas banyak tegalau tini,” uji Pak Beluk mulai begumam.

“Nah entah ce, kalu ade kaba ni durian dide ndak umban. Sebab durian umban ni masih tegantung ngan rezeki masing-masing. Malam kemaghi pas aku nunggu sughang banyak umbannye,” uji Merin sambil nahan tawe.

“Udimlah kudai Merin, kaba banyak ige cerite. Kalu memang durian kaba ni lum die neman umbanan. Jadi luk mane pule ndak banyak ye umban. Jadilah kudai sangi kerjei awak lah sesame tue ni,” Pak Beluk, empai sadar dikerjei Merin niupi setiap tangkai durian. (roh)




LEAVE A REPLY

Please enter your comment!
Please enter your name here