Beranda Cerita Pak Beluk Ndak Merantau

Ndak Merantau

50
0

PAK Beluk tejenggu di muke duaghe, kenan nampak litak nian. Waktu duduk itu Merin sampai. Merin langsung betanye ngan kantin setianye ini.

“Ngape kaba bapang Yung, nampaknye lemas nian? Bidapan atau ade masalah?” Merin nyerocos betanye.

Pak Beluk ngangkat muke sambil njawab lemas. “Penting ini ce, nanggung nian aku tige hari ini”.

“Yak ade ape kawan, kicikah saje. Siape tahu aku pacak nulung kabah, jangan sungkan kite bekantin iluk semenjak dulu,” kecik Merin, cak ngehibur.

“Dide ade pacak nulung kekantin ce, lah aku pastikan. Paling ye ade bakalkah ngerjei kalau aku cerite. Hanye Tuhan tulah ye pacak nulung aku ni,” timbal Pak Beluk dengan nada pasrah nian.

“Yak cerite kudai, mangke keruan aku. Siape tahu aku pacak nulung kabah,” bujuk Merin.

“Aku ni semegi dengan kabah seminggu lalu. Ndung Yung Pantit bidapan, demam lah tige hari. Seminggenye, urusan ghumah aku gale ye ngerjekah. Akap ngurusi dapugh, udim tu ke talang, balik ke dapugh agi. Lumpuh kalu mbak ini terus ce,” keluh Pak Beluk.

Sambil agak cecengir Merin nyebutkah. “Kalau mbak itu biase saje, aku lah udim pule. Kabah sabar saje, kele ade ngudimnye urusan itu”.

“Lah nyagu nian aku,” uji Pak Beluk

Timbal Merin agak manasi, “Kabah itu dirasekan nian. Kalau mbak itu terus, pasti kabah tebeban nian. Pacak jadi urusan dapugh kabah itu tekesan kerje pakse jaman Jepang”.

Dengan lantang Pak Beluk nimbal. “Au nian ce, aku lah purik nian. Kalau lame ndung Yung belum sihat, pacak merantau aku,” Pak Beluk, agak ngegas. (mrn)




LEAVE A REPLY

Please enter your comment!
Please enter your name here