Beranda Cerita Pak Beluk Kene Tipu

Kene Tipu

116
0

MERIN ni sedang mbutuhkan duit batan belanje baju dengan batan jalan-jalan. Kebetulan, niur Merin bebuah lebat anye ble ni sedutan naiknye. Nanyelah ble ni dengan kancenye Ujang Kricup.

“Ce, sape kekire ye galak naik i kelape ku tu. Lah banyak nian tue, anye aku bingung jualkah dengan siape,” tanye Merin

“Bingung luk mane ce, Pak Beluk kini lah jadi cingkau niur. Die tulah naiknye, die tulah mbukaknye ber buah di beli ble 2.500 anye sesuai ukuran,” jawab Ujang Kricup.

“Yak, serius ce, aku telpon kudai ame iluk itu,” kate Merin.

Tutt….tutttt..tuttt….tutttt bunyi hp Merin nelpon Pak Beluk.

“Aaah, tape lukaknye ce, jarang-jarang kabah ni nilpon ame dide bekendak,” kate Pak Beluk.

“Yak jangan luk itu ce. Aku ni yang endak ngenjuk kabah tu lukak. Amu kabah galak naik kelape ku di belakang rumah ni,” tanye Merin.

“Galak aku, berape batang kelape kamu tu ame lebih jak di 10 batang malah. Ame kurang jak di itu didekah galak aku ce. Bukan nolak rizki, badan lah payak mbulihkan dide,” jawab Pak Beluk.

Merin ni bingung, sedangkan kelape di belakang rumahnye ini hanye ade lime batang. Sedangkan, Pak Beluk endak 10 batang. Behubung mbutuhkah duit, ble ngicik l5 batang. Ndengar, itu Pak Beluk ni tesiap-siap lah.

“Aku hitung kudai, emmmmm….. ame dide salah adelah 15 batang jumlah kelape tu ce,” kate Merin.

“Serius anye, 15 batang nian kelape tu,” tanye Pak Beluk.

“Au serius aku tu ce,” kate Merin

“Siap bosku, akap pagi aku meluncur. Tapi minta tulung agi awu,” kate Pak Beluk.

“Tape agi? Banyak nian kendak kabah ni,” jawab Merin.

“Yak buatkan kupi akap pagi tu. Soalnye ndikan sempat agi aku ngupi dighumah,” rasan Pak Beluk.

“Ai gampang kalu Cuma itu,” kate Merin, meyakinkan.

Sesuai dengan jadwal akapnye Merin lah duduk diluar, la hade nian kupi 2 gelas. Sikuk lah diminumnye, sikuk agi masih betutup. Batan ndik Pak Beluk. Belum lame Pak Beluk sampai dengan muke gembire, tukuk ble lukak duit ini. Sedangkan, Merin muke slow.

“Malah kite gas ce, mangke cepat udim,” kate Pak Beluk.

“Malah,” kate Merin

Ate sampai di lokasi kelape Merin, Pak Beluk ni beritung. Dalam hatinye ngape hati lime batang kelape ni. Ngerase penasaran ble ni nanye dengan Merin.

“Cuma inilah ce kelape kamu, cakan 15 batang,” kate Pak Beluk.

“10 batang di ujung situ ce, naiklah kudai lime batang ni,” jawab Merin.

“Oke siap,” jawab Pak Beluk.

Lah udim naik kelape, udim pule mbukak i kelape, udim pule ngitung kelape ye masuk ukuran. Pak Beluk ni betanye.

“Malah ke badah 10 batang tu ce, mangke cepat udim,” ajak Pak Beluk.

“Bayarilah kudai hasil lime ni, mangke aku dide kelicar mbagi dengan gayik hasil kelape ni,” gaya Merin.

“Aulah ame iluk itu,” kate Merin.

Udim bebayar ni, Merin ni ngajak Pak Beluk balik

“ce malah balik, cume lime batang nilah kelape aku. Ye 10 batang diujung tu ndik jeme. Tadi lah kukicikan ngan diye, anye katenye kele saje naiknye,” kate Merin, uluk adak. Dide dikinaknye agi muke Pak Beluk lah ngabang. Merin langsung ngabur becicitan.(rjs)




LEAVE A REPLY

Please enter your comment!
Please enter your name here