Beranda Cerita Pak Beluk Endak Merantau Ke Jawe

Endak Merantau Ke Jawe

54
0

MERIN dengan Pak Beluk ni jauh hari lah ngicik dengan Ujang Kricup. Endak merantau ke pulau jawe. Berhubung sanak dengan Ujang Kricup, Pak Beluk ni ngicik dengan ble ni.

“Ce, aku ni sebulan agi kah berangkat ke jawe situ,” kate Pak beluk

“Yak, ngape kabah ke jawe ce. Ade lukak tape di situ ce,” jawab Ujang Kricup.

“Dide bedie lukak tu ce, cuma endak ngadu nasip ke badah jeme,” balas Pak Beluk.

“Alangkah sedih aku ndegar titu ce. Jauh nian kite bedue ni kele ce. Ame menurut aku kabah tu di sinilah ce, dide pule endak merantau nian. Ame kate jeme tu, ame kaye masih kah kaye,” balas Ujang Kricup.

“Au keruan aku ce, ame kaye masihkah kaye. Anye ame dide diusahekan didekah kaye ce,” jawab Pak Beluk.

“Kabah tu disinilah ude ce, dide nian seru ame kabah kah merantau jauh tu,” sambil muke sedih Ujang Kricup ngicik.

“Niat ku lah buat nian ce, kah merantau ni. Ame kamu pacak mintak tulung dengan kabah. Minjam kudai duit kabah 500 ribu ce. Batan modal aku merantau ni kele,” kate Pak Beluk.

“Au ce, kele aku bantu, demi cite-cite kabah ce,” jawab Ujang Kricup.

Lah due hari agi menjelang Pak beluk dengan Merin endak pegi. Pak Beluk ni cube ngehubungi Ujang Kricup. Endak mintak duit yang lah dipehamkan sebulan yang lalu.

“Tutt.tuttt…tutttt.tutttt,” bunyi hp Ujang Kricup.

“Uiii, halo tape lukak ce,” kate Ujang Kricup.

“Tini ce, aku ni due hari agi kah pegi. Ade die lukak duit yang kite janjikah sebulan lalu,” kate Pak Beluk.

“Au ce, maaf nian anye aku dide pacak ngenjuk kabah. Kini dang kering nian aku ni, tunggu kudai ce,” jawan Ujang Kricup.

Dalam hati ngicik Ujang Kricup ni. “Ukan aku ni ndung bapang mu Pak Beluk. Aku saje iluk dide hidup,”.

“Ooh, au ce ame dide bedie dide ngape ce,” jawab Pak Beluk.

“Tunggu kudai ce, kele ade batu batan kabah,” kate Ujang Kricup.

“Au ce,” jawab Pak Beluk.

Sehari menjelang pegi, Pak Beluk nelpon Ujang Kricup agi.

“Hallo ce, dide nian ade lukak duit kabah ce,” tanye Pak Beluk.

“Enduak ai, lupe nian aku ce, aku tadi pai ngudim ngiluki mesin ayik rusak ce. Habis sejuta ce, maaf nian ce,” alasan Ujang Kricup.

“Udim name e dide endak minjami duit kabah ni,” jawab Pak Beluk.

“Yak iluk mane ce, kanye aku ni dide galak bantu kabah. Tapi keadaan ce, amen aku anak Jokowi, yak gampang nian bantu kabah kalu sekedar 500 ribu ce,” skak Ujang Kricup.(rjs)





LEAVE A REPLY

Please enter your comment!
Please enter your name here