Beranda Cerita Pak Beluk Betanye Buyan

Betanye Buyan

127
0

PAK Beluk dengan ndung Yung Pantit duduk sesame udim didatangi tamu reraye. Jeme laki bini ini santai,Pak Beluk minum kupi sambil merokok. Sedangkan ndung Yung Pantit asyik nonoton film lebaran. Sedang asyik nonton tetibe ndung Yung Pantit neman mandang lakinya.

“Ngape kabah nginak aku cak itu nian ndung Yung?” tanye Pak Beluk.

“Aku ade ncium bau buntang kapuh. Ape ade tikus matik di dalam ghumah kite, atau ade ikan busuk dalam kulkas,” kate Ndung Yung.

“Ntah aku dide keruan, aku dide bedie tecium,” kate Pak Beluk.

“Naaa, baunye tambah busuk dan damping nian. Pusing aku bau ini, caknye bau ini dide mbuat nyaman,” kate Ndung Yung.

“Biarlah, kele lengit sughang,” sahut Pak Beluk, santai.

Penasaran ndung Yung.

“Luk bau kentut. Kabah kentut bapang Yung?” Ndung Yung tegauk.

Pak Beluk ditanye mendam saje. Tambah asyik ngembuskah asap rokok.
Nambah pesaran ndung Yung.

“Bapang Yung, kabah kentut nian?” Ndung Yung, betanye agi.

“Oiii ndung Yung kabah ini buyan betanye. Cuma kite bedue di sini. Kalau kabah dide kentut pasti aku. Dide perlu agi betanye beulang – ulang,” kate Pak Beluk agak kesal. (mrn)




LEAVE A REPLY

Please enter your comment!
Please enter your name here