Beranda Cerita Pak Beluk Bejijih Saje

Bejijih Saje

46
0

PAK BELUK santai di teras ghumahnye, kenan sedang betenang. Sebab Pak Beluk belas aghi udim ngetam. Jadi walau belum bejigak ndalak rezeki masih ade stok beghas. Tapi kesantaian Pak Beluk dide lame. Sebab bininye lah duduk pule di damping kenan. Biasenya, kalau lah besebelahan bakal ade saje bukak’an ndung Yung Pantit mbuat Pak Beluk pusing. Belum lame duduk langsung ngecik Ndung Yung.

“Dide kah ke mane – mane kabah Bapang Yung?” kate ndung Yung Pantit.

“Belum, kah istirahat kudai udim ngetam ni ndung Yung,” nimbal Pak Baluk.

“Inilah kabah, kalau ade pemakan itu harusnye manfaatkan untuk ndalak rezeki ye lain. Ukan duduk santai – santai manjangan,” kate Ndung Yung, mulai ngomel.

“Kite ini manusie, ade gale ye tukang aturnye. Ukan kite nentukah rezeki atau ye akan didapatkan dalam usahe. Jadi istirahat itu penting, sebab kalau makse kele bidapan tambah sare,” Pak Beluk masih santai njawab.

“Lanang itu dide mudah – mudah cerite takdir. Lanang itu harus kuat ndalak rezeki dide mudah nyerah,” kate Ndung Yung, dide galak ngalah.

“Kalau mudah – mudah merase puas, pantasan kite dide pacak maju-maju. Didekah tebeli ranggian alap ghumah ini kalau mbak ini terus,” tambah Ndung Yung Pantit agi.
Pak Beluk masih senyum.

“Inilah kabah kurang bersyukur Ndung Yung. Jadi manusie itu harus berpikir yang bijaksane. Sebab kite bukan ye kuase sagalenye. Degelah maksekah kehendak manjangan ini. Kalau ukan rezeki kite, makanan dalam mulut saje masih temuntah. Ape lagi rezeki ye belum ade kepastian,” Pak Beluk, mulai ngeluarkan hadist.

“Itu – itulah alasan kabah Bapang Yung. Lah nyagu aku nganingkah kicik kabah itu,” Ndung Yung, tambah kesal.

“Kah lukmanekan agi, sebab itulah ye benaghnye,” kate Pak Beluk, tambah mantap.

“Kicik kabah itu lagu lame, sejak kite nikah dulu. Anye kasetnye baru” Ndung Yung, langsung betegak langsung masuk ke dalam. Lah setengah jam, masih tedengar ngah Pak Beluk, bini kenan bemumut di dalam ghumah. Bejijih sughang. Sambil nonton misteri dua dunia. (mrn)




LEAVE A REPLY

Please enter your comment!
Please enter your name here