Beranda Cerita Pak Beluk Bantuan Corona

Bantuan Corona

55
0


PAK Beluk agak uring – uringan saat sampai di badah ngumpul. Kekantin agak tekejut, sebab dide seperti biasenye kenan ini. Saking penasaran kekantin payah nunggu selah untuk betanye. Karena muke Pak Beluk masih kusut dide kunjung udim. Make salah satu kawan kenan memberanikan diri betanye.

“Ngape kabah purik nian Bapang Yung, ade ape di ghumah?” tanye Merin.

Sambil sedikit ngilap Pak Beluk njawab, “Ukan masalah di ghumah ce. Aku purik nginak kondisi dunie ini. Segale sulit, bahkan jeme kagukan saje kini dide bulih. Alangkah sarenye kini, ngape dide mbuat kite makin miskin saje”.

“Yak namenye sedang pandemi virus corona. Jadi pemerintah sedang berupaye supaye paparan virus dide betambah dengan PPKM ini,” timbal Taun.

Sahut Ujang Kericup, “Oleh sebab itulah kite walau ngumpul mbak ini tetap jage jarak dan pakai masker ce. Kite harus maklum dengan kondisi kini. Jangan kabah pikirkan nian, santai saje. Makani saje ape yang ade”.

Tambah Merin, “Saking pemerintah peduli, kini banyak bantuan dinjukah dengan adik sanak yang kurang beruntung. Jadi kite dide perlu risau nian, yakinlah urusan ini akan udim”.

“Naaa, inilah kamu gegalenye ni dide paham. Akibat bantuan inilah corona terus memanjang. Dide pacak udim – udim, kite ye sakat akibatnya,” kate Pak Beluk agak ngegas.

“Maksud kabah lukmane Bapang Yung. Mase akibat bantuan corona dide udim – udim. Pepade kabah ngicik, kele salah penafsiran. Pacak masalah akibat kicik kabah tu,” kate Merin serius.

Pak Beluk sampaikah panjang libagh, “Cube kabah aningkah kicik adik sanak dapat bantuan. Ketike jeme tukang njuk bantuan ngicikan bantuan corona. Jawab adik sanak ninik mamak ape. Terimekasih, kekalau corona terus sehat dan diberikan umur panjang. Karena jutaan jeme mendoakan model itulah corona dide kisit – kisit”. (mrn)



LEAVE A REPLY

Please enter your comment!
Please enter your name here